ಎಲ್ಲಿ ನೋಡಿದರಲ್ಲಿ ರಾಮ -ಇದ ಬಲ್ಲ ಜಾಣರ ದೇಹದಲಿ ನೋಡಣ್ಣ ll
ಕಣ್ಣೇ ಕಾಮನ ಬೀಜ -ಈ ಕಣ್ಣಿಂದಲೇ ನೋಡು ಮೋಕ್ಷ ಸಾಮ್ರಾಜ್ಯ ಕಣ್ಣಿನ ಮೂರುತಿ ಬಿಗಿದು -ಒಳ ಗಣ್ಣಿಇಂದಲೇನೆ ದೇವರ ನೋಡಣ್ಣ ll1 ll
ಮೂಗೆ ಶ್ವಾಸ ನಿಶ್ವಾಸ -ಈ ಮೂಗಿಂದಲೇ ಕಾಣೋ ಯೋಗ ಸಂನ್ಯಾಸ ಮೂಗನಾದರೆ ವಿಶೇಷ – ಒಳ ಮೂಗಲಿ ನೋಡಣ್ಣ ಲೀಲಾವಿಲಾಸ ll 2 ll
ಕಿವಿಯೇ ಕರ್ಮಕ್ಕೆ ದ್ವಾರ -ಈ ಕಿವಿಯಿಂದಲೇ ಕೇಳೋ ಮೋಕ್ಷದ ಸಾರ ಕಿವಿಯೇ ಕರ್ಮ ಕುಠಾರ -ಒಳ ಗಿವಿಯಲ್ಲಿ ಕಾಣೋ ನಾದದ ಬೇರ ll 3 ll
ಬೊಮ್ಮ ಮಾಡಿದ ತನುಬಿಟ್ಟು -ವಿಶ್ವ ಕರ್ಮನು ಮಾಡಿದ ಬೊಂಬೆಯನಿಟ್ಟು ಸುಮ್ಮನೆ ಕೂಗುಗಳಿಟ್ಟು – ಅದ ನಂಬುವನೆಂಬೋನು ಹೋಹ ಕಂಗೆಟ್ಟು ll4 ll
ರೂಢಿಯೊಳಗೆ ಶುದ್ಧ ಮೂಢ – ಈ ಕಾಡು ಕಲ್ಲುಗಳನ್ನು ನಂಬಲಿ ಬೇಡ ನಾಡಾಡಿ ದೈವಗಳನೆಲ್ಲ – ನಮ್ಮ ಬಡದಾದಿ ಕೇಶವನೊಬ್ಬನೇ ಬಲ್ಲ ll 5 ll
*****